星島新聞集團主席何柱國透露 香港三屆特首勝出關鍵 何柱國訪問滄海遺珠
Johnson Choi-1008 09/02 82085.0/1 
星島新聞集團主席何柱國透露 香港三屆特首勝出關鍵 何柱國訪問滄海遺珠
星島新聞集團主席何柱國上星期以個人身份接受電視專訪，暢談普選、佔中等熱話。基於時間所限，有啲內容未出到街。本刊八到部分滄海遺珠，其實仲有好多過癮觀點，即管同大家分享下。
何柱國話，要搵一個人出來做特首，真係好艱難，「要搵一個有承擔，不怕艱苦嘅有能之人，係好困難嘅事。」佢透露過去三屆特首，都有不同優點，成為致勝的關鍵。
第一屆董建華，佢有船王董浩雲之子這個身份，不少國際領導人都認識佢，其人脈同影響力係當選嘅重要原因之一；至於第二屆曾蔭權，佢對政府各部門都十分熟悉，得到公務員團隊支持；至於第三屆梁振英，就係本地培養拼搏上位嘅專業精英代表，「不過三個特首到後期，都因為不同程度外國勢力嘅推波助瀾，導致民望急插。」
何柱國透露，特首人選難尋。
提到外國勢力影響，何柱國舉了日本做例子，「日本喺七、八十年代經濟非常強勢，有錢到可以喺美國大量買起當地嘅地標建築物，例如八九年三菱集團以十三億美元買起洛克菲勒中心十四幢辦公大樓，成為日本進軍海外的經典，亦令美國驚醒。八十年代開始，美國一方面不停讚日本係冧把溫強國，同時逼日圓升值，令本來每一美元兌近三百日圓嘅低位，升至一美元兌近八十的高峰，升幅高達三倍。
「大升值嘅後果，係嚴重打擊出口及投資，重創日本經濟。」佢話，呢個係日本經濟一沉不起，迷茫足三十年嘅最大原因。
何柱國話，當日本經濟泡沫爆破後，迫住將海外物業以蝕本價賣番出去，洛克菲勒中心的營運公司九五年就宣布破產，物業迫住要賣番畀美國人，至○○年，洛克菲勒家族重新廉價購回該十四幢大樓。「所以話美國嘅國際戰略視野真係一流。」面對中國崛起，何柱國覺得，美國係咪用同一條橋對付中國？一方面話佢係強國，另一方面千方百計拖佢後腳，又意圖逼人民幣升值？「所以，畀人讚唔好咁開心呀。」
何柱國喺美國住咗好多年，同不少美國政商界都熟，佢透露一件舊事，反映美國點解對中國咁有戒心，「十幾年前，曾經同美國福布斯集團董事長兼總編輯Steve Forbes喺香港香格里拉酒店飲下午茶，佢曾經想過競選總統。我問佢點解美國咁anti China，佢就話因為中國係共產黨執政，如果佢改名，可能美國對佢嘅印象會不一樣。」
何柱國坦言，佢家族都反共，喺四九年由內地到香港，資產都畀共產黨沒收。「後來阿爺見過鄧小平，了解過之後，就話中國有得救，因為佢走有中國特色嘅社會主義路線。例如江澤民時期容許私人擁有產業，實施政企分家，軍隊、國家部門不可以有公司或進行商業行為。到近期習近平大力打貪，也是一大進步，令社會更開放，更平等。」
他又透露，澳門回歸前亂到七彩，係因為社團與內地軍區往來甚密，令社會動盪不安，而阿爺撥亂反正之外，亦明令不准中資進入澳門，「中國係真心想做到一國兩制，連喺香港註冊嘅中資機構都唔入得澳門，以維持澳門平穩發展。」
對於人大常委全票通過政改方案，何柱國本周一再補充話，特首候選人要攞到提委會過半數呢個關卡好重要，有必要設立安全網，以防有人借此搞顛覆，影響埋內地政治。「點知有無無間道間諜？美國當年好多國民鍾意前國務卿基辛格，想佢做總統，但佢唔喺美國出世，無得出選，因為美國規定要土生土長嘅人至有資格。
「每個成熟國家都應該有自己嘅安全網，點知會唔會有間諜潛入來？你睇英國、美國o依家對有國民加入恐怖組織伊斯蘭國都好頭痕，點知人心係點諗？」
